ပျော်ရွှင်စွာနေထိုင်ပါ

******************* မျိုးသန့်

သဘာဝတရားကြီးက ပျော်ရွှင်ခြင်း ၊ ဝမ်းနည်းခြင်းတွေကို ဘယ်သူ့ကိုမှ ပိုမပေးခဲ့ပါဘူး ။ အားလုံးကို တန်းတူညီမျှ ပျော်ရွှင်ခြင်း ၊ ဝမ်းနည်းခြင်းတွေကို ပေးတာပါ ။

သူက ပိုက်ဆံမရှိလို့ ဝမ်းနည်းစရာတွေ ပေးတယ် ။ သူကချမ်းသာလာလို့ ပျော်ရွှင်ခြင်းတွေ ပေးတယ် ။ သူကရုပ်ချောလို့ စိတ်ချမ်းသာစရာတွေ ပေးတယ် ။ သူက ရုပ်ဆိုးလို့ စိတ်ညစ်စရာတွေ ပေးတယ် စသည်ဖြင့် တွေးနေတာတွေကို ရပ်လိုက်ပါ ။ ကိုယ့်ဆီ ကျရောက်လာသမျှ ပျော်ရွှင်ခြင်း ၊ ဝမ်းနည်းခြင်း ၊ ဝမ်းသာခြင်း ၊ အသားမဲခြင်း ၊ အသားဖြူခြင်း စသည်ဖြင့် အရာအားလုံးကို လက်ခံနိုင်ဖို့ လိုပါတယ် ။

အရည်အချင်းရှိတဲ့သူဆိုတာ အသားဖြူခြင်း ၊ မဲခြင်းနဲ့ ခွဲခြားလို့ မရပါဘူး ။ အရပ်ရှည်ခြင်း ၊ အရပ်ပုခြင်းနဲ့လည်း အရည်အချင်းကို တိုင်းတာလို့ မရပါဘူး ။ အရည်အချင်းရှိတဲ့ သူတစ်ယောက်က ကိုယ့်ဆီကျရောက်လာသမျှ အရာအားလုံးကို လက်ခံနိုင်စွမ်းရှိတယ် ။ အကောင်းဆုံး တုန့်ပြန်နိုင်စွမ်းလည်း ရှိကြတယ် ။ ပျော်စရာတွေ ရောက်လာရင်လည်း ကျေကျေနပ်နပ်နဲ့ လက်ခံလိုက်ပါ ။ စိတ်ရှုပ်စရာတွေကိုလည်း ကျေကျေနပ်နပ် လက်ခံလိုက်ပါ ။ လူတော်တော်များများက ပျော်ရွှင်မှုကိုပဲ လိုချင်ကြတာပါ ။ ဒါပေမဲ့ သူတို့က ပျော်ရွှင်အောင် မနေတတ်ကြဘူး ။ သူတို့ဆီကို ရောက်လာတဲ့ ကောင်းခြင်းဆိုးခြင်းတွေအပေါ် လိုက်ပြီးတော့ ခံစားကြတယ် ။ စိတ်ဆိုးခြင်းတွေလို့ ခေါ်လို့ရတဲ့ ဝမ်းနည်းခြင်း ၊ စိတ်ရှုပ်ခြင်း ၊ စိတ်ညစ်ခြင်းတွေကို ခဏခဏ ပြန်တွေးကြတယ် ။ ပျော်ရွှင်စရာတွေကိုကျ ခဏခဏ ပြန်တွေးလေ့မရှိဘူး ။ လူတစ်ယောက်က စိတ်ကြောင့် မပျော်ရွှင်ရတာပါ ။

ကိုယ်တိုင် ဖန်တီးယူလို့ရတဲ့ ပျော်စရာတွေလည်း ရှိပါတယ် ။ 

 သီချင်းတွေနားထောင်တာ

ဂီတသံစဉ်တွေက စိတ်ကို ပျော့ပျောင်းနူးညံ့စေတယ်တဲ့ ။ သံစဉ်ငြိမ်ငြိမ်လေးတွေ နားထောင်ရင်း အေးအေးလေးနေလို့ရပါတယ် ။ မြူးကြွတဲ့သံစဉ်နဲ့အတူ စိတ်ခွန်အားဖြစ်စေမယ့် သီချင်းမျိုးကိုလည်း နားထောင်လို့ရပါတယ် 

ကိုယ်ရတဲ့ သီချင်းဆို လိုက်ပြီး အကျယ်ကြီး အော်ဆိုလို့ရပါတယ် ။ သီချင်း အကျယ်ကြီး အော်ဆိုလိုက်တာက စိတ်ထဲမှာ မွန်းကျပ်နေသမျှကို ပြေပျောက်စေပါတယ် ။ စိတ်ကို ပေါ့ပါးစေပါတယ် ။ သီချင်းနားထောင်ရင်း အလုပ်လုပ်တာက ပိုပြီး သက်သောင့်သက်သာ ဖြစ်စေပါတယ် ။ ပျော်ရွှင်ခြင်းတွေ ဖြစ်တည်လာဖို့အတွက် သီချင်းနားထောင်လို့ ရပါတယ် ။ တချို့သော ပျော်ရွှင်ခြင်းတွေကို ကိုယ်တိုင်ဖန်တီးယူရင်း ဘဝကို ပျော်ရွှင်စွာနေထိုင်ပါ ။

 ခရီးတွေထွက်တာ

စိတ်တွေ အရမ်းညစ်နေရင် ခရီးထွက်ပါ ။ ပင်လယ်ပြင်ကြီးကို စိတ်ထဲရှိသမျှ အော်ပြောလိုက်ပါ ။ တောင်တန်းကြီးတွေကို ငေးကြည့်ရင်း ဘဝအမောတွေ ဖြေဖျောက်လိုက်ပါ ။ ခရီးသွားတာက အတွေ့ အကြုံကောင်းတွေ ရပါတယ် ။ စိတ်ကို Excited ဖြစ်စေပါတယ် ။

ပိုက်ဆံတွေ အများကြီးရှိမှ ခရီးသွားလို့ရတာ မဟုတ်ပါဘူး ။ ပိုက်ဆံ အနည်းငယ်ရှိရုံနဲ့ ခရီးတွေ သွားလို့ရပါတယ် ။ ပင်လယ်ထဲမှာ ရေကစားရင်း စိတ်ပေါ့ပါးစွာ နေပါ ။ တောင်တန်းတွေကို ဖြတ်ကျော်ရင်း ဖြစ်ပျက်သမျှအပေါ် အကောင်းဆုံး ကျော်ဖြတ်နိုင်ဖို့တွေးပါ ။

လူ့ဘဝခရီးက တိုတိုလေးမို့ ရှင်သန်ရတဲ့ အခိုက်တန့်မှာ ပျော်အောင်နေပါ ။ ဘဝကို ပျော်ရွှင်စွာ ရှင်သန်ပါ ။ တချို့ ပျော်ရွှင်ခြင်းတွေက ဖန်တီးယူလို့ရတယ် ဆိုတာကို လက်ခံပါ ။

#ပျော်ရွှင်စွာနေထိုင်ပါ #MyoThant